Limang Alasan Geneo nek Kuwe Wong Pati kok Nyaman nek Semarang [Artikel Basa Jawa]

Pati karo Semarang iku ibarate koyok dulur tuwo. Mboh gene aku yo ora reti, nangeng mesti angger bada nek desaku neng Pati iku akeh banget motor karo mobil seng plate H. Di sisi lain, pas aku kuliah nek Semarang iki. Mbendino ubeng-ubengan dalan Semarang, uakeh buanget motor utowo mobil nganggo plat K akhiran A (plat Pati). Seolah-olah wong Pati nek Semarang iku rasane wes meh koyok nek omahe dewe.

    Ternyata pas tak teliti dewe, ono beberapa alasan kenopo wong Pati seng kerjo utowo Kuliah nek Semarang iku do betah urep nek kono. Iki kiro-kiro limang alasane geneo nek kuwe wong Pati kudu kerjo utowo kuliah nek Semarang. Nek kuwe nduwe alasan liyane sangger tulis ae alasanem nek kolom komentar. :D
1. Bahasane meh podo
    Seng paling utama iku Bahasane meh podo (mbe'e ora podo-podo banget sih). Nanging nek kuwe wong Pati kok lungo kuliah opo kerjo nek Semarang mesti langsung iso beradaptasi. Nada omongan Pati karo Semarang iku mirip plek. Nanging nek ko kebahasaan ono perbedaan sitik, contone nek Wong Pati tulen iku ngomonge gagego lah-leh-lah-leh, nek nok Semarang iku nganggo 'to' kadang nek pas takok diwei akhiran 'ndak an'.
conto kalimate:
Pati -> Lho omahem iku sandinge wak Kardi? Kok ora kondo aku leh! Aku kan dulure..
Semarang -> Lho omahmu kuwi sandinge kang Kardi ndak an? Kok rak kondo aku to! Aku kan dulure..

    Tapi secara umum meh podo, nek kuwe ora teliti yo bingung, iso-iso ono wong Pati bok arani wong Semarang, utowo sewalike, wong Semarang malah bok arani wong Pati.

2. Iklime meh podo
    Seng marai wong Pati betah nek Semarang selanjute iku Iklime. Yo, Semarang karo Pati iku iklime puersis ora ono bedane. Nek kadung panas, panase mantep! tapi nek kadung Udan kadang yo ngasik do kebanjiran (terutama Pati/Semarang seng daerah pesisir).

    Seng nek daerah Nggunung yo podo wae mirip. Daerah Pati nggunung iku podo karo daerah Semarang nduwur (istilahe wong Semarang seng urep nek daerah rodok nggunung). Terutama nek kuwe kuliah opo kerjo nek daerah Gunung Pati. Beeh puuersis karo nek Pati hawane. Wit e, wong-wonge, omah-omahe, nek kuwe sempet jajalo ntrasak-ntrasak nek daerah alas utowo perkebunan telo nek Gunung Pati. Tak jamin, roso kangenem karo Pati iso langsung terobati.

3. Ono keterkaitan sejarah
    Nah iki ternyata seng paling berpengaruh geneo kok wong Pati iso ayem banget urep nek Semarang. Ternyata, Pati karo Semarang iku nduwe keterkaitan sejarah. Sak ora-orane ono beberapa keterkatian sejarah.

    Seng nomer siji, Aku tau moco nek Wikipedia, asal usul kecamatan Gunung Pati seng nek Semarang iku ternyata asal usule seko  Jaman Mataram.

    Jaman semono pas daerah Tuban mberontak karo Mataram, Adipati Joyokusumo ngirim pasukan nggo numpes pemberontakan Tuban. Nah nek perang iku, ternyata pasukan Pati kalah karo Tuban. Soyo mundur soyo mundur pertahanane geser mengulon bar-barane prajurit Pati do mlayu nek nggone daerah alas ngger kidul-kulone Semarang. Soyo suwe ndelik nek daerah kono ternyata prajurit Pati iku mau do wegah muleh (menowo durung ono Bis karo BRT dadine wegah muleh meneh nek Pati) terus do omah-omah nek kono ngasik ono perkampungan. Ono penggede prajurit Pati jengene Kiai Pati terus njenakno daerah kono iku seng nggone Gunung-Gunung isine wong Pati dadine Gunung Pati. Mulakno ngasik jaman saiki, nek kuwe kerjo nek kono utowo kuliah (nek UNNES contone) iku rasane ayem kok nek omahe dewe, mergo ancen isine iku yo asale wong-wong Pati.

    Sejarah seng nomer loro, ternyata makame penggedene Pati iku yo ono nek Semarang. Nek kuwe tau ndungu jengene Kiai Pragolo (dudu radio Pragola FM karo pasar Pragolo lo ya). nek ijeh ora reti, Kiai Pragolo iku yo seng biasane diarani Wasis Joyo Kusumo. Adipati Pati pertama anake Ki Ageng Penjawi konco plek e Kyai Ageng Pemanahan (nek ijeh ramudeng ndelok o kethoprak lur!).

    Dadi jaman semono, Adipati Wasis Joyo Kusumo a.k.a Kiai Pragola Pertama iki sempet dongkol ambel kerajaan Mataram. Dongkole mergo Pati iku amen didholimi karo Mataram. Nah suatu ketika Adipati Wasis Joyo Kusumo iki mergo saking dongkole dekne ngutus kon mberontak karo Mataram. Sambi berontak, dekne juga mbebasno daerah-daerah jajahane Mataram koyok dene Semarang. Daerah seng dibebasno mau dikon melu ngewangi mbrontak nek Mataram. Neng, mboso wes tekan perbatasane Mataram, Wasis Joyo Kusumo ngenteni pasukan Mataram. Dinteni suwi ra metu-metu bosen seng ngenteni, Wasis Joyo Kusumo muleh balik Pati. Eh ndelalah pas muleh ape balek Pati, Gunung Merapi mbledos. Prajurit Pati akeh seng Mati.

    Rugi akeh mergo kelangan pasukane seng do Mati goro-goro Gunung Merapi. Wasis Joyokusumo mau muleh dewe karo beberapa pengawale, ora ngasik tekan Pati dekne malah luweh mileh netep nek daerah Gunung Pati, Semarang. Dekne mileh mengasingkan diri nek kono daripada terus direndahno karo penggedene Mataram ngasik sak matine.

    Nah nek kuwe kok kebeneran nek Semarang, ojo lali ziaroh nek makame Wasis Joyo Kusumo a.k.a Kiai Pragola. Lokasi makame ono Desa Plalangan, Gunung Pati, Semarang. Nek bingung bukak Google Maps wae, ngko ketemu. Hahaha.

4. Budaya keislamane podo
    Nah iki nek kuwe kebeneran wong Islam seng Santri. Kuliaho utowo Kerjo o nek Semarang. Rausah kuatir. Mergo, mayoritas wong Semarang iku wonge NU kabeh. NU ne iku persis karo NU nek Pati (terutama daerah Kajen). Mboh keneng opo aku ora reti, menowo wae kok ono ikatan keilmuan antarane Kyai-Kyai Pati karo Kyai-Kyai Semarang. Mergo nek kuwe tau melu Tahlilan nek Semarang iku Tahlilane ternyata podo plek karo nek Pati.

    Podo karo nek Pati, nek semarang yo ijeh akeh seng do nyekel tradisi-tradisi Islam Nusantara koyo dene tradisi Dugderan. Dugderan iku biasane dianakno pas meh mlebu sasi poso. Biasane karo ngarak Warak Ngendok, Warak Ngendok iku jarene sih simbol persatuan masyarakat Semarang, mergo kewan Warak iku ndase koyok nogo sing ngelambangno wong Cino, awake karo gulune koyok unto seng ngelambangno wong arab, sikile iku koyok wedus seng nglambangno wong Jowo. Dadine Warak Ngendok iku wujud toleransine wong-wong Semarang.

    Muludan, Yasinan, Ngaji Maleman yo kerep dianakno nek mesjid-mesjid kampung daerah Semarang. Nanging nek nok daerah kampus-kampus koyok UNNES opo UNDIP iku wes mulai jarang. Nek mesjid kampus UNNES ro UNDIP wes ora patek kroso ke NU ane, nanging nek nok daerah kampung sekitare ijeh akeh seng do NU. Tapi nek kuwe nek UIN Walisongo meh roto-roto ijeh do NU kenthel. Mesjid kampuse, mesjid-mesjid kampunge yo do NU. Senajan yo ono beberapa Mesjid Muhammadiyah karo MTA nek kono, tapi yo apek rukun ora tau uring-uringan kok. Malah nek aku poso wingenane Trawehe nek Mesjid Muhammadiyah, kan enak to mek 8 (wolong) rekaat tok. Hahaha irit tenogo. Tapi nek nuju pengen olahraga mesti nek mesjid kampung seng NU aku, kan 23 rekaat cepet sisan. Metu ko mesjid menggeh-menggeh koyok bar mlayu mubeng simpang lima.
  
    Nek kebeneran sampean wong Muhammadiyah yo rasah kuatir. Mesjid Muhammadiyah nek perumahan-perumahan uakeh podo wae. Kajian-kajiane kadang yo mantep, nekakno ustad-ustad kondang Muhammadiyah. Utowo nek kepengen njajal-njajal ape melu nek nggone Mesjid e NU yo ramasalah lawong yo podo-podo Islame wae. Hahaha. Seng penting rukun ora do tukaran lak wes a?

5. Nek kuliah kampuse apik. Nek Kerjo gajine akeh.
    Iki alasan seng paling penting. Nek Semarang iku nggon seng paling sempurna nggo kuliah utowo kerjo wong Pati. Selain cerak (mek mbutuhno wektu 2 jam tok nek motoran ko Pati, utowo 2,5 jam nek ngebis ongkose 15ewu adate nggo bis Suroboyoan), Semarang iku yo kampus-kampuse top top sak Jawa Tengah bahkan sak Indonesia. Gajine nek kuwe kerjo nek Semarang yo top markotop.

    Mulai ko kampuse. Semarang iku gudange kampus-kampus jos gandos (senajan ora se-Jos Jogja tentunya), nanging lumayan jos lah dibanding daerah liyane. Nek Semarang ono Kampus UNDIP neng Tembalang, ono Kampus UNNES nek Sekaran karo Ngaliyan, ono Kampus UIN Walisongo nek Ngaliyan, ono UNISSULA nek cerake terminal Terboyo, ono UNTAG, ono UDINUS nek cerak Tugu Muda, ono UNISBANK nek cerake simpang lima, ono UPGRIS, ono UNWAHAS. Wah mboh akeh pokoke!. Selain kampuse ancen top markotop, biaya hidup neng Semarang iku yo podo karo nek Pati. Umume Sego Rames+Endog+Es Teh mek 7000 (tapi nek nok UNDIP rodok larang sitik). Nek aku dewe biasane mek Sego Rames+Endog+banyu Puteh mek 5000. Dadi rasah kuatir nek ape kuliah nek Semarang. Irit lah pokoke!.

    Kerjonan nek Semarang yo akeh podo wae. Selain dikenal kota Kampus, Semarang iku yo gudange kantoran Pabrik-Pabrik jos, koyok kantore Tempo, Nyonya Meneer, Telkomsel, Indosat, XL, TVRI, RRI, tipi-tipi nasional kantor cabange yo nek Semarang, pusat Pemerintahan Jawa Tengah yo podo wae nek kono. Wes pokoke mblarah kerjonan kawet seng Kantoran, Pabrikan ngasik seng Borongan. Pinter-pinter wae ngeluru, ngko yo ngasik bingung milihe. Hahaha. Wes kerjonane akeh bayarane yo lumayan. UMR e Semarang tahun 2017 iki wae iku Rp2.125.000, bandingno ae karo Pati tahun 2017 seng mek Rp1.402.000. Kan lumayan iso nggo ngurip-nguripi pawon nek omah. Hahaha

    Yo iku lah mau kiro-kiro limang alasan gene kok wong Pati iku iso nyaman nek Semarang. Mulaknan akeh tonggo-tonggoku seng bar-barane do nikah ntuk wong Semarang dan do omah-omah nek kono. Pas bada trus do mbleder motor karo mobil plate H. Gentenan nek pas kuliah, mahasiswa Pati nek Semarang yo ora sitik, dadi nek duwite entek iso luru utangan karo bolo mahasiswa Pati liyane. Hahaha. Kan sesama wong Pati harus saling membantu. Iyo po ra leh?.

    Nek kuwe nduwe alasan liyo geneo kok kuwe ayem nek nok Semarang, tulis wae komentarem nek kolom komentar ya.. :D Matursembahnuwun [#muhtam]